Akeredolu pasẹ lilo ẹrọ aṣofofo (CCTV) lawọn ibi ipẹjọpọ nipinlẹ Ondo

Oluṣẹyẹ Iyiade, Akurẹ

Nitori akọlu to waye ninu ṣọọsi Katoliiki Francis Mimọ niluu Ọwọ, Gomina Rotimi Akeredolu ti paṣẹ siṣeto awọn ẹrọ a-ka-aworan silẹ (CCTV) si gbogbo ibi ti ipẹjọpọ ti n waye kaakiri ipinlẹ Ondo.

Ninu atẹjade kan ti Arakunrin fi sita lọjọ Abamẹta, Satide, ọsẹ to kọja, lo ti sọrọ yii, to si ni oun paṣẹ naa latari ọkan-o-jọkan ipenija eto aabo to n sẹlẹ lawọn apa ibi kan lorilẹ-ede Naijiria.

Aṣẹ yii lo ni o gbọdọ fidi mulẹ lawọn ibi ipẹjọpọ bii, ile-ijọsin (ṣọọsi ati mọṣalasi), banki, ile-itaja, ile-iwe (lati alakọọbẹrẹ titi de Fasiti), ile-ijo, ile-ọti, ile-itura, ọsibitu, ibudokọ ati ibi gbogbo tawọn eeyan ba n pejọ pọ si.

Gomina ni nibaamu pẹlu agbara tí oun ni labẹ abala kẹrindinlọgọsan-an (176) ninu iwe ofin Naijiria ni oun n paṣẹ fun gbogbo ibi tawọn eeyan ba ti n pejọ pọ si lati lati ṣeto ẹrọ a-ka-aworan silẹ, eyi ti yoo maa mojuto gbogbo awọn iṣẹlẹ to ba n waye layiika wọn.

Awọn ẹrọ wọnyi ni gomina ni o gbọdọ ni awọn ohun eelo ti yoo maa ṣe akọsilẹ awọn nnkan tabi iṣẹlẹ to ba n waye nibi ipẹjọpọ naa ki awọn ẹṣọ alaabo le ri nnkan ṣamulo nigbakuugba ti ohunkohun ba ṣẹlẹ.

O ni wọn tun gbọdọ mọ ọgba ti ko fi bẹẹ ga yi awọn ibi ipẹjọpọ ọhun ka pẹlu awọn ẹṣọ alaabo ti yoo maa mojuto bi awọn eeyan ṣe n wọle ati bi wọn ṣe n jade.
Gomina ni oun ti paṣẹ fawọn ẹsọ alaabo bii, ọlọpaa, sifu difẹnsi ati Amọtẹkun lati maa kaakiri awọn ibi ipẹjọpọ gbogbo lati rii daju pe ofin tuntun naa fidi mulẹ.
O ni alakooso tabi adari ibi ipẹjọpọ ki ipẹjọpọ to ba kuna ati tẹle aṣẹ yii yoo foju bale-ẹjọ ni ibamu pẹlu abala igba le mẹta (203) ninu iwe ofin Naijiria.

Leave a Reply