Ikọ Amọtẹkun mu afurasi ajinigbe l’Ekiti

Oluyinka Soyemi, Ado-Ekiti

Ikọ Amọtẹkun labẹ idari Ọgagun-fẹyinti Joe Kọmọlafẹ ti mu ọmọkunrin ẹni ọdun mẹtalelogun kan ti wọn fura si bii ajinigbe niluu Ifaki-Ekiti, nijọba ibilẹ Ido/Osi, lọjọ Aje, Mọnde, ọsẹ yii.

Ọgagun-fẹyinti Kọmọlafẹ ṣalaye pe lasiko tawọn ikọ naa n lọ kaakiri ni wọn ri ọmọkunrin naa to jade lati inu igbo pẹlu aṣọ ṣọja, nigba ti wọn si mu un lo jẹwọ pe ajinigbe loun, oun ki i ṣe ṣọja rara.

Adari Amọtẹkun ọhun ni ọmọkunrin to kọkọ pe ara ẹ ni Adebayọ Damọla ko too sọ pe Emmanuel Tunde loun n jẹ ọhun sọ fawọn to mu un pe ilu Ọyẹ-Ekiti loun n gbe, ṣugbọn ọmọ ipinlẹ Kogi loun.

Kọmọlafẹ ni, ‘Nigba tọwọ tẹ ẹ, o ni ọmọ ipinlẹ Kogi loun, iṣẹ fọganaisa loun si n ṣe niluu Ọyẹ-Ekiti. Bakan naa lo ni Ado-Ekiti gangan loun ti n bọ, nibi toun ti lọọ ṣe ifọrọwanilẹnuwo lọdọ ikọ Man O War.

‘Iwadii wa fidi ẹ mulẹ pe Ifaki lo n gbe, nigba ta a si de yara ẹ la ba oriṣiiriṣii nnkan tawọn ṣọja n lo, eyi to sọ pe ọkunrin ologun kan niluu Eko ko foun.’

Ọgagun-fẹyinti naa waa sọ ọ di mimọ pe ọjọ kọkandinlogun, oṣu yii, gan-an ni Gomina Kayọde Fayẹmi yoo ṣefilọlẹ ikọ Amọtẹkun nipinlẹ Ekiti, ikọ naa si ti ṣetan lati gbogun ti ijinigbe, ipaniyan, idigunjale atawọn iwa ọdaran mi-in.

O bẹbẹ fun ifọwọsowọpọ awọn eeyan, bẹẹ lo ni wọn yoo gbadun ikọ ọhun nitori yoo fun araalu lominira lọwọ awọn to n da wọn laamu.

Nigba to n fesi si afurasi ajinigbe tọwọ tẹ, Alukoro ọlọpaa Ekiti, Sunday Abutu, sọ pe loootọ lo ti wa lọdọ awọn, ẹka iwadii ọdaran (CID) ni olu-ileeṣẹ ọlọpaa lo si wa lọwọlọwọ.

About Alaroye

Journalist, Press man and News Researcher of the federal Republic of Nigeria

Check Also

Wọn ti tu Oriyọmi Hamzat silẹ lahaamọ

Iroyin to tẹ ALAROYE lọwọ ni pe awọn ọlọpaa ti tu Oludasilẹ Redio Agidigbo, Oriyọmi …

Leave a Reply

//ugroocuw.net/4/4998019
%d bloggers like this: