Ipinlẹ Ogun ni Mumini ti ji owo lanledi rẹ, Oṣogbo lọwọ awọn Amọtẹkun ti tẹ ẹ 

Florence Babaṣọla, Oṣogbo

Ọwọ awọn ikọ Amọtẹkun ipinlẹ Ọṣun ti tẹ ọmọkunrin kan, Mumini Saheed, ẹni ọdun mẹrindinlogoji, niluu Oṣogbo, miliọnu kan ati ẹgbẹrun lọna igba naira (#1.2m), awọn nnkan ẹṣọ ara ati oogun abẹnugọngọ ni wọn ba lọwọ ẹ.

Ọsan oni ni wọn ri i ti Mumini n rin regberegbe kaakiri ninu ileewosan ijọba to wa ni Aṣubiaro, niluu Oṣogbo, pẹlu baagi dudu kan to gbe lọwọ, nigba ti wọn beere ibi to n lọ, kabakaba lo n sọ lẹnu, idi niyi ti wọn ṣe fi ọwọ lile mu un.

Bayii ni Mumini bẹrẹ si i ka boroboro. O ni inu yara lanledi oun to n gbe lagbegbe Local Government Secretariat, niluu Shagamu, nipinlẹ Ogun, loun ti ji miliọnu kan ẹgbẹta naira (#1.6m) to wa ninu baagi naa ninu oṣu keji, ọdun yii.

Owo lanledi to ji

Mumini jẹwọ pe ẹni ọgọrin ọdun ni lanledi oun yẹn, ati pe oun loun maa n tọju ẹ, idi si niyẹn toun fi lanfaani si yara ẹ. O ni obinrin naa buru pupọ, ko si fi owo mọ awọn ọmọ to bi ninu, idi niyẹn toun fi pinnu lati ja a lole.

Ṣugbọn ko pẹ to sa kuro niluu Shagamu ni ajakalẹ arun Korona bẹrẹ, o wa n sa kaakiri laarin ilu Oṣogbo ati Ibadan, o ni oun ti na ẹgbẹrun lọna irinwo naira ninu owo naa, oun si ti pinnu pe oun yoo gba ile ninu ẹ ti igbele Koronafairọọsi yii ba ti kọja.

Bakan naa ni awọn Amọtẹkun ba fọto oyinbo kan ninu ẹru rẹ, o si sọ pe ẹnikan lo mu fọto naa waa foun fun adura pataki.

Lasiko ti a n ko iroyin yii jọ, wọn ti fa a le awọn ọlọpaa Ọja-Ọba Division lọwọ fun iwadii to peye.

Nigba to n sọrọ nipa iṣẹlẹ naa, Alakooso ikọ Amọtẹkun l’Ọṣun, Alhaji Amitolu Shittu, kilọ fun gbogbo awọn oniwa ibajẹ lati yẹra nipinlẹ Ọṣun, nitori ṣe ni aṣiri wọn a maa tu lẹyọkọọkan.

 

 

About Alaroye

Journalist, Press man and News Researcher of the federal Republic of Nigeria

Check Also

Lẹyin ọdun mẹta ti tẹnanti tilẹkun ile pa, adajọ ni ki lanlọọdu lọọ ja a n’Ilọrin

Ibrahim Alagunmu, Ilọrin L’Ọjọbọ, Tọsidee, ọsẹ yii, ni ile-ẹjọ Majisreeti kan niluu Ilọrin paṣẹ ki …

Leave a Reply

//zikroarg.com/4/4998019
%d bloggers like this: