Idowu Akinrẹmi, Ikire
Gomina ipinlẹ Ọyọ, Ẹnjinni Ṣeyi Makinde, ti fun Ṣọun Ogbomọṣọ, Ọba Jimọh Ọladunni Oyewumi, ni miliọnu lọna ọgọrun-un naira (100m) lati tun aafin ẹ ti awọn janduku bajẹ laipẹ yii ṣe.
Ọjọ Iṣẹgun, Tusidee, ni gomina ṣabẹwo si kabiyesi, to si fi owo naa ta a lọrẹ. Ṣaaju lawọn eeyan kan to n fẹhonu han lori iku Jimọh Isiaq, ẹni to ku iku ojiji latari iwọde awọn to n fẹhonu han nitori FSARS, ti ya bo aafin Ṣọun, ti wọn ba ọpọlọpọ nnkan jẹ nibẹ, koda, ori lo ko kabiyesi ati minisita ana kan yọ lọwọ wọn.
Bakan naa ni Makinde de ile awọn obi Jimọh ti ibọn ba lasiko iwọde ifopin si SARS ọhun, o ba baba rẹ kẹdun nile wọn to wa lagbegbe Alasa, l’Ogbomọṣọ, o si fun wọn lowo pẹlu.