O ṣẹlẹ, Awọn agbebọn ji adajọ gbe ni kootu

Ọsan gangan ọjọ Iṣẹgun, Tusidee, ọsẹ yii, ni Adajọ Kootu Ṣaria kan kagbako awọn ajinigbe. Alaaji Hussaini Samaila ni adajọ naa ti awọn agbebọn-rin ti wọn tun jẹ ajinigbe, gbe sa lọ ninu kootu rẹ to wa nijọba ibilẹ Safana, nipinlẹ Katsina.

Abule kan ti wọn n pe ni Bauren Zakat ni kootu naa wa tẹlẹ gẹgẹ bawọn eeyan wọn ṣe wi, wọn ni ṣugbọn wọn ti gbe e lọ sibi kan to n jẹ Safana. Tibọn-tibọn ni wọn ni awọn ajinigbe ọhun ya wọ kootu yii, ni wọn ba ko Adajọ Samaila ni papamọra, wọn si gbe e lọ tefetefe.

Ohun ti iṣẹlẹ yii fi ru awọn eeyan loju ni pe, awọn oṣiṣẹ kootu wa lẹnu iyanṣẹlodi lọwọlọwọ, ko sẹni to n lọ si kootu latigba ti wọn ti bẹrẹ iyanṣẹlodi naa.

Ohun ti Adajọ Samaila lọọ ṣe ni kootu lọsan-an gangan to bọ sọwọ yii ṣokunkun si gbogbo awọn to gbọ pe wọn gbe e sa lọ ni.

Alukoro ọlọpaa nipinlẹ Katsina, Gambo Isah, fidi iṣẹlẹ yii mulẹ.

O ṣalaye pe nitori aabo ti ko to naa ni wọn ṣe gbe kootu yii kuro nibi to wa tẹlẹ, ti wọn gbe e lọ si Safana. Gambo sọ pe Adajọ Samaila ko beere fọlọpaa tabi ẹṣọ kankan to fi da lọ si kootu, ẹnikẹni ko mọ pe o wa nibẹ.

O fi kun un pe awọn oṣiṣẹ kootu ko ṣiṣẹ lasiko yii paapaa, ohun ti adajọ lọọ ṣe ni kootu ko ye ẹnikan. O ni iwadii ti bẹrẹ ṣa lati ri idi okodoro iṣẹlẹ naa.

Titi ta a fi pari iroyin yii, wọn ko ti i gburoo Adajọ Hussaini Samaila, bẹẹ lawọn to ji i gbe ko ti i kan si mọlẹbi rẹ fun owo itusilẹ.

Leave a Reply