O ga o: terela Dangote tun g’ori ọlọkada l’Agọ-Iwoye, o pa a patapata

Laaarọ yii ni. Ere buruku ni wọn ni mọto terela Dangote naa n ba bọ, o n bọ lati inu Agọ-Iwoye, o fẹẹ kọri sọna Ijẹbu-Ode ni. Afi bo ṣe de ibi ikorita abajade-niluu ti ọwọ mọto gbodi mọ ọn lọwọ. N lo ba gori ọlọkada kan to n lọ jẹjẹ tirẹ, bẹẹ lo pa a danu, to si ṣe awọn mẹta mi-in leṣe. N lawọn araalu to wa nitosi ba binu, wọn dana sun terela naa, wọn si mura lati lu dẹrẹba to wa a pa.

“O fẹrẹ jẹ pe nnkan mi-in wa lara awọn dẹrẹba ti wọn n wa mọto Dangote kiri, awọn ti wọn fi n ko simẹnti ati awọn nnkan mi-in, iwakuwa wọn ti pọ ju, ere asapajude ni wọn maa n sa bii pe ko si ohun ti ẹnikẹni le fi wọn ṣe. Ohun to si ṣẹle ni Agọ-Iwoye laaarọ yii niyẹn.” Bẹẹ lẹni kan ti ọọ yii sọju rẹ so f’Alaroye.

Apala ko jiya to ọkunrin to wa terela yii nigba ti awọn araalu ki i mọlẹ nibi to ti fẹẹ maa sa lọ, wọn ko kumọ bo yẹyẹ, wọn n fẹẹ yanju ẹ lẹẹkan koun naa maa tẹ le ọlọkada lọ. Ṣugbọn awọn agbofinro ti wọn wa nitosi ko jẹ, wọn gba a lọwọ wọn, wọn si mu un lọ si agọ ọlọpa Igbẹba ni Ijẹbu-Ode.

Alukoro ajọ to n dari ọkọ loju popo lagbegbe naa, Babatunde Akinbiyi, ni ọrọ naa ko ba ti buru to bẹẹ bi ki i baa ṣe ere asaju ti ọkunrin to wa terela naa n sa. Igba to sare de ikorita ọna Ibadan, to ni ki oun yiwọ jade s’ọna Ijẹbu-Ode ni mọto gba ibomi-in mọ ọn lọwọ, to fi di pe o lọọ pa ẹni ẹlẹni to n gun ọkada Bajaaj rẹ lọ.

Wọn ti gbe oku ọkunrin naa lọ si mọṣuari to wa ninu ọsibitu Femtop n’Ijẹbu-ode nibẹ, ti awọn ti wọn fara pa si n gba itọju. Ma jẹ ka rin lọjọ ti ebi yoo pa ọna Ọlọrun; ka ma rin arinfẹsẹsun; ki oloriburuku ma si ko tirẹ ba wa.

About Alaroye

Journalist, Press man and News Researcher of the federal Republic of Nigeria

Check Also

Nitori to ni oun yoo fopin si eto aabo ni Borno ati Yobe, PDP Ekiti sọrọ si Fayẹmi

Taofeek Surdiq, Ado-Ekiti Ẹgbẹ PDPipinlẹ Ekiti ti yẹgẹ ẹnu si gomina ipinlẹ Ekiti, Dokita Kayọde …

Leave a Reply

//dooloust.net/4/4998019
%d bloggers like this: