O ma ṣe o, iwaju ile Ọlanrewaju lawọn agbebọn pa a si l’Ekiti

Oluyinka Soyemi, Ado-Ekiti

Ileeṣẹ ọlọpaa Ekiti, labẹ idari CP Tunde Mobayọ, ti bẹrẹ iwadii ijinlẹ lati mọ awọn to pa ọdọmọde oniṣowo kan, Ọlanrewaju Ọladapọ,  niluu Ado-Ekiti l’Ọjọruu, Wẹsidee, ọsẹ yii.

Oloogbe naa lawọn agbebọn kan da ẹmi ẹ legbodo ni nnkan bii aago mẹwaa ku iṣẹju mẹẹẹdogun alẹ ọjọ naa nile ẹ to wa lagbegbe Dallimore, l’Ado-Ekiti.

Ẹnikan to n gbe lagbegbe tiṣẹlẹ ọhun ti waye sọ fun ALAROYE pe agbegbe ọhun naa ni Ọlanrewaju ti n ta kaadi ipe atawọn nnkan jijẹ, bo si ṣe kuro ni ṣọọbu ẹ lo kọri sile. O ni awọn agbebọn naa tẹle e de ile ẹ to wa lẹyin ileewosan kan lagbegbe ọhun, ẹnu ọna gan-an ni wọn si pa a si.

Lẹyin eyi lo ni wọn ko owo atawọn nnkan ini ẹ mi-in ki wọn too ba tiwọn lọ.

Akọroyin wa gbọ pe oṣu diẹ sẹyin ni oloogbe naa ko de ibi ti wọn pa a si yii, iru iṣẹlẹ bẹẹ lo si n sa fun to fi ko wa si agbegbe naa, ṣugbọn o jọ pe awọn to n le e kiri naa lo pada da ẹmi ẹ legbodo.

Ọdọmọde oniṣowo to jara mọ’ṣẹ ni wọn pe Ọlanrewaju nigba aye ẹ, bẹẹ lo jẹ ẹni to bọwọ fun eeyan, ki i ṣe oniwahala rara.

Ni bayii, ileeṣẹ ọlọpaa Ekiti, nipasẹ ASP Sunday Abutu to jẹ Alukoro wọn, ti sọ pe awọn n ṣewadii iṣẹlẹ ọhun lọwọ, awọn si n wa awọn amookunṣika ọhun.

Lasiko ta a pari akojọpọ iroyin yii, mọṣuari ni oku oloogbe wa.

About admin

Check Also

Wọn ti tu Oriyọmi Hamzat silẹ lahaamọ

Iroyin to tẹ ALAROYE lọwọ ni pe awọn ọlọpaa ti tu Oludasilẹ Redio Agidigbo, Oriyọmi …

Leave a Reply

//unbeedrillom.com/4/4998019
%d bloggers like this: