Ọmọ iya mẹta lu fijilante pa l’Aṣero

Adefunkẹ Adebiyi, Abẹokuta

Iya ati baba kan naa lo bi Okiki Mulero, Micheal Mulero ati Joseph Mulero, awọn mẹtẹẹta ni wọn ti wa latimọle bayii, nitori wọn lu fijilante So-Safe kan torukọ ẹ n jẹ Ṣẹgun Godfrey Barde pa l’Aṣero, niluu Abẹokuta.

Ọjọ Keresimesi to kọja yii ni wahala ṣẹlẹ, nigba ti Okiki Mulero to n ṣiṣẹ ọkada wiwa fẹẹ wọ Ẹsiteeti OGD, l’Aṣero, to si jẹ pe o gbe ju eeyan kan lọ.

Ofin Ẹsteeti naa ni pe ọlọkada ti yoo ba wọbẹ ko gbọdọ gbe ju eeyan kan ṣoṣo lọ, eyi lo fa a ti awọn ọlọdẹ to n ṣọ ẹnu ọna ibẹ ko ṣe jẹ ko wọle.

Ai jẹ ko wọle naa lo bi Okiki, ẹni ọdun mẹtalelogun, ninu, n lo ba pe awọn aburo rẹ mejeeji ti i ṣe Micheal ati Joseph, pe ki wọn waa kun oun lọwọ lati koju awọn ọlọdẹ to jẹ oṣiṣẹ So-Safe naa.

Bi wọn ṣe de ni wọn yọ igi, ti wọn bẹrẹ si i lu awọn ẹṣọ meji to n ṣiṣẹ wọn jẹẹjẹ naa.

Nibi ti wọn ti n lu wọn ni igi ti ba Ṣẹgun Godfrey Barde nibi to lagbara, bẹẹ lọkunrin naa ṣubu lulẹ, ti ko le dide mọ. Wọn sare gbe e lọ sọsibitu, sugbọn nibi ti wọn ti n tọju rẹ lo ku si.

Awọn ọmọ iya mẹta yii jẹwọ nigba tọwọ tẹ wọn pe awọn lawọn lu Ṣẹgun to fi ja siku.

Ẹka ti wọn ti n gbọ ẹjọ apaayan ni awọn mẹtẹẹta wa bayii, gẹgẹ bi CP Ajogun Edward ṣe paṣẹ.

 

Leave a Reply