Taye ati Kẹhinde to n ṣe ‘yahoo’ rẹwọn he ni Kwara

Stephen Ajagbe, Ilorin

Olukọ ileewe giga kan to wa niluu Ọffa, Kwara State College of Health Technology, Abdullahi Ọpaṣhọla, ati ọmọ iya meji ti wọn jẹ ibeji, Taiye-Kẹhinde Adebayọ, ni wọn ti dero ẹwọn bayii fẹsun jibiti ori ẹrọ ayelujara tawọn eeyan mọ si ‘Yahoo-Yahoo’.

Adajọ Adenikẹ Akinpẹlu tile-ẹjọ giga kan nipinlẹ Kwara lo paṣẹ pe ki Ọpaṣhọla lọọ ṣẹwọn oṣu mẹrin, o si sọ awọn ibeji naa sẹwọn oṣu mẹfa.

Ajọ EFCC lo wọ awọn afurasi mẹtẹẹta lọ sile-ẹjọ l’Ọjọbọ, Tọsidee, ọsẹ yii, nibi tile-ẹjọ ti gbe idajọ rẹ kalẹ.

Awọn olujẹjọ mẹtẹẹta gba pe loootọ lawọn jẹbi ẹsun ti EFCC fi kan wọn.

Ọpaṣhọla ni wọn lo n lo ayederu orukọ; Devin Snow, pẹlu foto obinrin alawọ funfun, lati fi lu oyinbo kan, Eugene Myvett, ni jibiti igba dọla, $200 USD.

Ni ti Taiye Adebayọ, ẹsun ti wọn fi kan an ni pe, laarin oṣu kin-in-ni, ọdun 2020, o lu oyinbo kan, Gary Brenton, to pade lori ikanni ibanidọrẹẹ TWOO, ni jibiti ẹẹdẹgbẹta din mẹwaa dọla, $490.

Bẹẹ naa lẹsun ti wọn fi kan Kẹhinde Adebayọ, ori ikanni TWOO kan naa lo ti pade Gary Brenton, to si lu u ni jibiti irinwo dọla, $400 USD, lẹyin to fi ifẹ ẹtan tan an, to si pe ara rẹ ni obinrin fun iyẹn.

Agbẹjọro EFCC, Andrew Akoja, ko awọn ẹri to daju silẹ, o si pe awọn ẹlẹri meji; Paul Kera ati Emezie Dominic, lati jẹrii lori ẹsun naa.

Adajọ Akinpẹlu ni ki olukọ ileewe giga naa, Ọpaṣhọla, ṣẹwọn tabi ko san owo itanran ẹgbẹrun lọna ọgọrun-un le aadọta naira, #150,000.

Bakan naa, Adajọ fun Taiye ati Kẹhinde lanfaani lati sanwo itanran ẹgbẹrun lọna aadọta naira lori ẹsun kọọkan ta a fi kan wọn tabi ki wọn lọọ ṣẹwọn. Ẹsun mẹfa ọtọọtọ to da lori jibiti ni EFCC fi kan awọn mejeeji.

Leave a Reply