Wọn dajọ iku fun Ṣọla, awakọ tirela to digunjale n’Ileṣa

Florence Babaṣọla, Oṣogbo

Lori ẹsun idigunjale, adajọ ile-ẹjọ giga kan niluu Ileṣa ti dajọ iku fun Ṣọla Emorua.

Ṣọla, ẹni ọdun mọkandinlọgbọn, ni wọn fẹsun idigunjale ati igbimọ-pọ huwa buburu kan. Ọjọ kọkandinlọgbọn, oṣu kin-in-ni, ọdun 2018, ni wọn kọkọ ṣafihan rẹ ni kootu.

Agbẹjọro lati ileeṣẹ eto-idajọ nipinlẹ Ọṣun, Motọlani Ṣokẹfun, salaye pe ọjọ keje, oṣu karun-un, ọdun 2015, ni olujẹjọ huwa naa lagbegbe Ayọruntọ, loju-ọna Ilesa si Akurẹ, niluu Oṣu.

O sọ pe aago marun-un aabọ irọlẹ ni Ṣọla atawọn ẹgbẹ rẹ ko ibọn ati ada, ti wọn si digun ja awakọ tirela karosin-in-ni kan to ni nọmba XV 298 APP, Ismaila Azeez.

Ṣokẹfun sọ siwaju pe Ṣọla nikan ni Azeez da mọ laarin awọn adigunjale naa. O pe ẹlẹrii mẹta, o si fi ọpọlọpọ nnkan ẹri silẹ funle-ẹjọ.

Agbẹjọro fun olujẹjọ, Kehinde Aworele, sọ fun kootu pe Ṣọla ti sọ laimọye igba pe oun ko ba ẹnikẹni sọ nnkan ti awọn ọlọpaa gbe siwaju ile-ẹjọ gẹgẹ bii ọrọ ti wọn ni oun sọ.

Ṣugbọn Onidaajọ Isiaka Adeleke ṣalaye pe olujẹjọ jẹbi ẹsun mejeeji ti wọn fi kan an, nitori naa, o paṣẹ pe ki wọn yẹgi fun un titi ti ẹmi yoo fi bọ lara rẹ.

About Alaroye

Journalist, Press man and News Researcher of the federal Republic of Nigeria

Check Also

Lanlọọdu ati getimaanu pa ọmọọdun mẹrin, wọn yọ ẹya ara ẹ lati fi ṣoogun owo

Faith Adebọla Diẹ lo ku kawọn araalu tinu n bi dana sun baba getimaanu kan …

Leave a Reply

//zeechumy.com/4/4998019
%d bloggers like this: