Adewale adeoye
Ọkan pataki lara ọmọ ẹgbẹ oṣelu New Nigerian Peoples Party (NNPP) to n ṣoju ẹkun Bebeji/Kiri, nipinlẹ Kano, nileegbimọ aṣoju-ṣofin kekere l’Abuja, Ọnarebu Abdulmumin Jibrin, ti ni ko sohun kankan to le di Aarẹ Tinubu lọwọ lasiko ibo ọdun 2027. O ni Aarẹ lo maa wọle lai si idiwọ kankan fun un lasiko naa.
Ọjọruu, Wẹsidee, ọjọ kẹta, oṣu Kẹsan-an, ọdun yii, ni Ọnarebu Jibrin sọrọ ọhun di mimọ nibi eto ori tẹlifiṣan kan l’Abuja. O ni ni toun o, oun ko ri ohun kankan to le di Tinubu lọwọ lati ma ṣe wọle sipo pada lọdun 2027, nitori pe oun nifẹẹ si i, awọn araalu naa si nifẹẹ si iṣakooso ijọba rẹ daadaa.
Bakan naa lo bẹnu atẹ lu ahesọ kan tawọn araalu kan n sọ pe awọn ara Oke–Ọya ko nifẹẹ si Aarẹ Tinubu. O ni eeyan tawọn ara Oke–Ọya nifẹẹ si ni, wọn yoo si dibo fun un lasiko ibo ọdun 2027.
Aṣofin yii ni, ‘‘Ko soootọ ninu pe awọn ara Oke–Ọya ko nifẹẹ si Aarẹ Tinubu, a wa lẹyin rẹ gbagbaagba ni, oun la maa dibo wa fun lasiko ibo ọdun 2027. Loootọ, awọn kọọkan l’Oke–Ọya ko nifẹẹ si i, ṣugbọn awọn ti wọn nifẹẹ rẹ lo pọ ju awọn ti ko nifẹẹ si i. Bi asiko ibo ọdun 2027 ba ṣe n sun mọ, ẹ maa ri i pe awọn ara Oke–Ọya maa fifẹ han si Aarẹ Tinubu, wọn si maa dibo fun un’’.
O waa rọ awọn oloṣelu ẹya Hausa pe ki wọn ma ṣe dabaa lati dije dupo pẹlu Aarẹ Tinubu lasiko ibo ọdun 2027. O ni ki wọn jẹ ki ẹya Yoruba pari saa wọn tan ko too di pe wọn maa jade lati dije dupo aarẹ orileede yii lọdun 2031.
Leave a Reply