Ijọba fẹẹ maa gbowo lọwọ awọn tiṣẹ wọn n ko idọti ba awujọ l’Ogun

Adefunkẹ Adebiyi, Abẹokuta

Awọn ti wọn n ṣe omi inu ọra, omi inu ike, awọn onilailọọọnu atawọn mi-in ti wọn n ṣe awọn nnkan eelo tawọn eeyan n lo tan ti wọn n ju sọnu yoo bẹrẹ si i sanwo diẹdiẹ sapo ijọba ipinlẹ Ogun lati ọdun to n bọ lọ, gẹgẹ bi ileeṣẹ to n ri si imọtoto ayika nipinlẹ yii ṣe sọ.

Kọmiṣanna fun ayika nipinlẹ Ogun, Ọnarebu Abiọdun Abudu-Balogun, lo sọ ọrọ yii di mimọ lọsẹ to kọja, lasiko to n ṣalaye lori aba iṣuna ọdun 2021, nile igbimọ aṣofin ipinlẹ yii.

Ọga ileeṣẹ imọtoto naa ṣalaye pe awọn nnkan bii ike omi, bii lailọọọnu atawọn nnkan bẹẹ lo n di koto idominu lọpọ igba, ti wọn si tun maa n kun oju titi kaakiri. Bẹẹ, ewu ni wọn jẹ fun alaafia awọn eeyan, eyi to fa a tijọba fi n nawo ribiribi lori wọn lati ko wọn kuro.

Lati le ran ijọba lọwọ ninu inawo naa ni Ọnarebu Abiọdun sọ pe o fa a ti awọn ileeṣẹ wọnyi yoo fi maa sanwo diẹdiẹ si apo ijọba. O ni kekere lowo ti wọn yoo maa san latọdun to n bọ naa, bi a ba wo iye ti ijọba n na lori wahala awọn ike ati lailọọnu yii.

O fi kun un pe ijọba yoo ṣe awọn koto idaminu sawọn ọja ati agbegbe kaakiri si i, bẹẹ ni wọn yoo la awọn koto nla ti wọn n pe ni kanaali (Canal), ki ọna ati da ẹgbin nu tun le rọrun si i. Balogun pe fun ifọwọsowọpọ awọn ileeṣẹ tọrọ kan, o ni ki wọn ma ri igbesẹ yii bii irẹnijẹ, ṣugbọn ki wọn gba a bii ọna kan lati ran ilu lọwọ latara iṣẹ wọn ti wọn n ṣe.

About Alaroye

Journalist, Press man and News Researcher of the federal Republic of Nigeria

Check Also

Tori pe wọn yinbọn paayan meji, afurasi ọmọ ẹgbẹ okunkun meje dero ahamọ l’Abẹokuta

Gbenga Amos, Abẹokuta Lati ọjọ Iṣẹgun, Tusidee, ọjọ kẹrinlelogun, oṣu Karun-un yii, lawọn gende mẹrin …

Leave a Reply

//zikroarg.com/4/4998019
%d bloggers like this: