Related Articles
Oluṣẹyẹ Iyiade, Akurẹ
Pẹlu ibinu lawọn eeyan agbegbe Okelisa, niluu Ondo, fi tu jade lọjọ Aje, Mọnde, oni lati fẹhonu han si bi awọn ole kan ṣe n fi igba gbogbo ji waya ina wọn ka lọ.
Irọlẹ ana lawọn eeyan agbegbe ọhun kọkọ ko ara wọn jọ si idi ẹrọ amunawa ti wọn ṣẹṣẹ ka waya rẹ lọ naa, nibi ti wọn ti jiroro lori igbesẹ to yẹ ki wọn gbe lati fopin si iru iṣẹlẹ bẹẹ lọjọ iwaju.
Gbogbo awọn agbaagba atawọn to mọ ọwọ yi pada to wa nibẹ ni wọn pa ẹnu pọ gbe awọn to n fi igba gbogbo sọ wọn sinu okunkun biribiri ọhun ṣepe ki wọn too lọọ fi iṣẹlẹ naa to awọn ọlọpaa teṣan Ẹnuọwa leti.
Aarọ kutukutu oni ni wọn lọ si olu-ileeṣẹ BEDC to wa loju ọna marosẹ Ademulẹgun lati fi ẹdun ọkan wọn han awọn to n mojuto ina ọba niluu Ondo ọhun.
Abilekọ Ileọla Ibrahim to ṣaaju awọn to n fẹhonu han yii di ẹbi waya ti wọn n ji ka naa le awọn oṣiṣẹ BEDC lori, o ni ko ṣee ṣe ki ẹni ti ko ba mọ nipa ina maa ṣe iru iṣẹ laabi bẹẹ kiri.
Awọn waya ẹrọ amunawa to wa lawọn agbegbe bii Ọpẹoluwa, Surulere, Ade Super ati Okelisa lo ni awọn oniṣẹẹbi ọhun ka lọ laarin ọsẹ kan pere, eii to mu kawọn eeyan wa ninu okunkun lati igba naa.
Gbogbo akitiyan wa lati ri Alukoro ileeṣẹ BEDC nipinlẹ Ondo ba sọrọ lori iṣẹlẹ naa lo ja si pabo.
