Mr Macaroni rọ awọn ọmọ Naijiria lati dan ẹgbẹ oṣelu mi-in wo yatọ si APC ati PDP

Monisọla Saka

‘‘Ko le si ayipada rere kan bayii fun Naijiria, ta a ba ti yee paarọ awọn olori lati PDP si APC, bii ẹni paarọ aṣọ.’’
Gbajugbaja adẹrin-in-poṣonu nni, Debo Adedayọ ti ọpọ eeyan mọ si Mr Macaroni lo sọrọ yii di mimọ lori ẹrọ alatagba Twitter. O sọ pe oun ko le ṣatilẹyin fun ẹgbẹ oṣelu to wa lori aleefa yii, APC ati PDP to jẹ ẹgbẹ alatako.
Ọkunrin alawada yii sọ ọ di mimọ pe onikaluku lo lẹtọọ lati ṣe ẹgbẹ oṣelu to ba wu u, bẹẹ lo tun fi kun un pe oun yoo darapọ mọ ẹgbẹ oṣelu mi-in, oun si gbagbọ pe awọn naa yoo pada goke.
Ninu awọn ọrọ to kọ sori ẹrọ alatagba ‘Twitter’ rẹ, lọjọ Aje, Mọnde, ọjọ kẹrinlelogun, oṣu Karun-un yii, lo ti ṣalaye pe, ayipada rere o le ba orilẹ-ede yii gẹgẹ bawọn eeyan ṣe n poungbẹ rẹ tawọn eeyan wa o ba yee paarọ awọn adari wa lati PDP si APC.
Gẹgẹ bo ṣe kọ ọ sori ẹrọ ayelujara, o ni, “Ẹnikẹni lo lẹtọọ lati darapọ mọ ẹgbẹ oṣelu to ba fẹ, mi o le ṣe ẹgbẹ APC tabi PDP laelae. Gbogbo eebu tẹ ẹ ba ri ni ki ẹ bu mi, ohun ti mo fẹ ni mo sọ yẹn”.
“Ma a kuku yaa darapọ mọ ẹgbẹ oṣelu mi-in, mo si nigbagbọ pe ẹgbẹ oṣelu ọhun naa yoo di igi araba nla lọjọ kan. Ta a ba fẹ ki nnkan yipada, ipilẹ la gbọdọ ṣatunṣe si!
Gbogbo ohun temi ti maa n duro le lori ree, mo si ti sọ ọ laimọye igba. Ta a ba fẹ ki nnkan yipada si daadaa, a a kan le maa poyi loju kan naa bii omi inu ẹku”.

Nigba to n pe awọn eeyan lati ja ara wọn gba lọwọ awọn adari wa ti ko fẹ nnkan an ṣe yii, o ni, “Nigba to ba su onikaluku, ẹ jẹ ki koowa wa lọọ darapọ mọ ẹgbẹ oṣelu mi-in, ka si gba orilẹ-ede wa pada lọwọ awọn to ti n ṣejọba le wa lori lati aimọye ọdun.
” Ẹ ma wo ti awọn to n bẹnu atẹ lu ọrọ ẹgbẹ oṣelu tuntun o. Loootọ, ki i ṣe ohun to le rọrun lati ṣe, bẹẹ ni ki i ṣe lẹẹkan naa ni a le ri ijọba gba lọwọ wọn, ṣugbọn ibi kan naa la ti gbọdọ bẹrẹ. Ko si ohun to le da awọn eniyan duro, ti iṣọkan ba ti wa laarin wọn”.

About Alaroye

Journalist, Press man and News Researcher of the federal Republic of Nigeria

Check Also

Adajọ agba ilẹ wa, Tanko Muhammad ti kọwe fipo silẹ

Adewumi Adegoke Adajọ agba ile-ẹjọ to ga ju lọ nilẹ wa, Onidaajọ Ibrahim Tanko Muhammad, …

Leave a Reply

//thaudray.com/4/4998019
%d bloggers like this: